Nemendum í Menntaskólanum á Akureyri ber að sækja allar kennslustundir og koma stundvíslega til kennslu.

Mæting nemenda er skráð í Innu og er aðgengileg nemendum og forráðamönnum ólögráða barna. Inna sýnir annars vegar raunmætingu nemandans, það er hvaða tíma hann hefur sótt, og hins vegar mætingu þegar veikindi hafa verið dregin frá fjarvistum.

Skólasókn (raunmæting og mæting að teknu tilliti til veikinda og leyfa) er birt á stúdentsskírteini nemenda. Nemendur fá einingu fyrir skólasókn ef raunmæting er að lágmarki 95% yfir önnina.

Leyfi frá skóla  

Almennt skal sækja um leyfi úr skóla í gegnum Innu:

  • Forsjáraðilar sækja um leyfi fyrir nemendur yngri en 18 ára.
  • Nemendur 18 ára og eldri geta sótt um leyfi.
  • Þegar sótt er um leyfi þarf alltaf að tilgreina ástæðu.

Athugið að alla jafna eru ekki veitt leyfi í tengslum við atvinnu nemenda, tómstundir og frístunda- eða fjölskylduferðir enda ætti það að rúmast innan þess svigrúms sem skólinn gefur (90% mætingarskylda).

Fjarvera er á ábyrgð nemenda og ekki er hægt að ætlast til hliðrunar á námsmati eða verkefnaskilum vegna hennar. Nemandi skal upplýsa kennara tímanlega um væntanlegt leyfi.

  • Gert er ráð fyrir að nemendur sinni persónulegum erindum sínum utan skólatíma. Leyfi eru samþykkt vegna nauðsynlegrar fjarveru sem ekki rúmast utan skólatíma s.s. nám í ökuskóla, læknisheimsókna og sjúkraþjálfun.
  • Afreksfólk, t.d. íþróttum, tónlist o.fl., getur sótt um leyfi frá skólasókn. Leyfi vegna keppnisferða eða ferða á vegum íþróttafélags er veitt ef staðfesting frá þjálfara/sérsambandi liggur fyrir.

Veikindi

Tilkynna skal um veikindi nemenda fyrir kl. 10 á morgnana með því að skrá þau í Innu. Skráningin er í höndum forráðamanna ólögráða nemenda en lögráða nemendur tilkynna veikindin sjálfir.

Skólinn áskilur sér rétt til að óska eftir að vottorði sé skilað, t.d. ef fjarvistir nemenda vegna veikinda eru miklar.

Nemendur, sem eiga við langvinn veikindi að stríða eða búa við aðstæður sem geta haft áhrif á skólasókn þeirra, skuli hafa samband náms- og starfsráðgjafa eða aðstoðarskólameistara. Hægt er að sækja um það að í slíkum tilvikum sé skólasóknar ekki getið á námsferli.

Veikindi í prófum

Afar mikilvægt er að tilkynna veikindi áður en próf hefjast. Ef um próf í próftíð í lok annar er að ræða þarf að hringja í afgreiðslu skólans 455-1555 eða senda póst á ma@ma.is. Sérstök sjúkrapróf verða þá auglýst. Einnig þarf að tilkynna veikindi ef eru próf/verkefni á önninni og nemandi þarf að hafa samband við kennara eins fljótt og auðið er varðandi möguleika á sjúkraprófi/verkefni. Skólinn getur óskað eftir því að nemendur skili inn vottorði vegna veikinda í prófum.

Símat og vinnueinkunn

Að jafnaði gilda sömu reglur um skólasókn í símatsáföngum og öðrum áföngum, en kennurum er heimilt að setja strangari skólasóknarreglur í námsáætlun enda skiptir þátttaka og viðvera nemenda miklu í slíkum áföngum. Ef mæting fer undir þau viðmiðunarmörk og ástundun/skil nemanda eru lítil getur farið svo að nemandi verði skráður úr áfanganum.

Sérstakar reglur gilda um vægi skólasóknar í einkunn fyrir íþróttir.

Ábyrgð nemenda

Nemendum ber sjálfum að fylgjast með skólasókn sinni í Innu. Ef nemandi þarf að vera mikið frá vegna íþrótta eða leyfa ber hann ábyrgð á því að fylgjast með hvað fram fer í námi á þeim tíma. Það sama á við um nemendur sem eru frá vegna skammvinnra veikinda. Nemendur sem glíma við samfelld eða erfið veikindi hafa samband við náms- og starfsráðgjafa.

Skráning fjarvista

Í upphafi hverrar kennslustundar hefur kennari nafnakall og skráir viðveru. Ef nemandi mætir eftir að nafnakall er tekið fær viðkomandi fjarvist.

Kennara er heimilt að gefa nemenda fjarvist að gefnu tilefni, t.d. fyrir að spilla vinnufriði eða fyrir aðra óæskilega hegðun og þátttökuleysi.

Brot á reglum um skólasókn

Nemendur geta fylgst með skólasókn sinni í Innu. Á fimm til sex vikna fresti er mætingayfirlit tekið og nemendum undir lágmarksmætingu send viðvörun eða áminning. Ef mæting nemanda er komin undir 90% telst hann vera kominn undir lágmarksmætingu.

Heimilt er að vísa nemanda tímabundið úr skóla, bæti hann ekki ráð sitt en megináherslan er lögð á að fá nemendur til að bæta mætingu sína og halda áfram í skólanum. Fjarvistauppgjör eru tekin u.þ.b. þrisvar á önn og nemanda og forráðafólki sendar upplýsingar um stöðu nemandans ef hann er undir viðmiðunarmörkum. Námsráðgjafar, stjórnendur eða umsjónarkennarar ræða við nemendur í kjölfarið.

Ef fjarvistir nemanda í einstaka áfanga eru orðnar fleiri en sem nemur kennslustundafjölda áfangans yfir fjórar vikur þegar mætingaryfirlit er tekið, er nemandinn að jafnaði skráður úr áfanganum.

Ef nemandi er meira en eina önn undir viðmiðunarmörkum án skýringa getur það leitt til þess að hann verði ekki innritaður næstu önn.

Umsjón með skólasókn

Aðstoðarskólameistari hefur yfirumsjón með skólasókn nemenda. Nemendur hafa aðgang að upplýsingum um skólasókn sína í Innu.