Eik er sigurvegari í Söngkeppni MA 2021

Þormar og Þorsteinn (tv), Eik og Jóna Margrét (th) á sviðinu í Söngkeppni MA

Kvosin klæddist sparifötunum í kvöld þegar Söngkeppni MA 2021 fór fram. Sannkallað augna- og eyrnakonfekt fyrir þá sem voru á staðnum og þann stóra hóp áhorfenda sem fylgdist með keppninni í beinni útsendingu á youtube-rás Hugins.

Spennuþrungið andrúmsloftið leyndi sér ekki þegar úrslit voru kunngerð. Tilkynnt var um þrjú efstu sætin og vinsælasta atriðið að mati áhorfenda. Úrslit urðu með eftirfarandi hætti:

Sigurvegari kvöldsins var Eik Haraldsdóttir. Hún flutti lagið Like a star með Corinne Bailey Rae.

Annað sæti hreppti Jóna Margrét Guðmundsdóttir með lagið Alone. Hljómsveitin Heart gerði lagið vinsælt á sínum tíma.

Í þriðja sæti urðu félagarnir Þormar Ernir Guðmundsson og Þorsteinn Jakob Klemenzson. Þeir fluttu frumsamið lag, Haltu mér, slepptu mér.

Vinsælasta atriði kvöldsins var flutningur á laginu When I was your man með Bruno Mars. Flytjendur voru Einar Ingvarsson, Hreinn Orri Óðinsson,  Kári Gautason og Örvar Óðinsson.

Úrslitin þýða að Eik Haraldsdóttir verður fulltrúi skólans í Söngkeppni framhaldsskólanna árið 2021. Við óskum henni og öllum sem tóku þátt í þessari glæsilegu sýningu, til hamingju með afraksturinn.