Glæsilegur árangur í eðlisfræði

Eðlisfræðiúrvalið.

Óvenjuglæislegur árangur náðist í forkeppninni í eðlisfræði þar sem fjórir nemendur úr MA eru í þeim fjórtán nemenda hópi sem fær að taka þátt í lokakeppninni. Þeir eru Tryggvi Unnsteinsson, Valtýr Kári Daníelsson, Rúnar Unnsteinsson og Atli Fannar Franklín. Aðalkeppnin fer fram í Háskóla Íslands dagana 21. - 23. mars næstkomandi.

Dagskrá keppninnar er sem hér segir:

• Laugardagur 21. mars. Stofa 261 í VRII  kl 9:00 - 12:00 - Fræðileg úrslitakeppni.
• Sunnudagur 22. mars. VRI  kl 9:00 - 12:00 - Verkleg úrslitakeppni.
• Verðlaunaafhending á Háskólatorgi kl 16:30-18:00.
  

Tuttugu efstu keppendur í forkeppninni fá bókaverðlaun fyrir góðan árangur og fimm efstu keppendur í úrslitum fá peningaverðlaun. Stefnt er að því bjóða fimm keppendum  sem standa sig best í úrslitum að vera í keppnisliði Íslendinga á Ólympíuleikunum í eðlisfræði sem fram fara í Mumbai á  Indlandi 5. - 12. júlí sbr. http://www.ipho2015.in/ Keppendur á Ólympíuleikunum mega ekki vera orðnir 20 ára 30. júní 2015.

Þessi óvenjugóði árangur í eðlisfræðikeppninni minnir óneitanlega á það þegar nemendur MA stóðu sig manna best í eðlisfræði skólaárið 2001-2002 þegar þeir skipuðu meirihluta liðs Ólympíufara það árið og vorið 2004, þegar 4 af 5 liðsmönnum voru nemendur MA. Þess ber líka að geta að nú standa málin þannig hjá Atla Fannari Franklín, nemanda í 2. bekk, að hann hefur tryggt sér þátttökurétt í lokakeppni í þremur greinum, efnafræði, stærðfræði og eðlisfræði. Það er meira en lítið.

Skólinn fagnar glæsilegum árangri þessara drengja og óskar þeim til hamngju og velfarnaðar í lokakeppninni.