Ljós á aðventu

Jólaljós 2008 á Skólatorgi, hjarta Akureyrar í Vaðlaheiði sést líka

Þegar vel heppnuð árshátíð skólans var að baki og ný vinnuvika hófst, fullveldisdaginn 1. desember, voru kveikt ljós á jólaré á skólatorginu. Það er reyndar löngu liðin tíð að fullveldisdagurinn sé frídagur í skólum, en í Menntaskólanum á Akureyri er árshátíðin ævinlega kennd við þann dag, þótt hún fari gjarnan fram þann föstudag sem næstur liggur.

Í löngu frímínútum í dag fór hópur nemenda út á skólatorg í hríðarhraglanda og þá voru kveikt ljós á jólatré skólans. Myndin var tekin þegar liðið var að kvöldi. Tréð sómir sér vel þarna og bregður litum á torgið, en ef að er gáð sést líka vel hjarta bæjarins, sem slær í Vaðlaheiðinni gegnt bænum, en kveikt var á því á laugardaginn.