MA-ingar stóðu sig vel í forritunarkeppni framhaldsskólanna

Um 40 MA-ingar tóku þátt í forritunarkeppni framhaldsskólanna. Mynd: Ingvar Þór Jónsson.

Forritunarkeppni framhaldsskólanna sem HR stendur fyrir fór fram um helgina og var haldin í Háskólanum á Akureyri og Háskólanum í Reykjavík. Aldrei hafa fleiri tekið þátt eða alls 173 nemendur og þar af voru 40 MA-ingar sem kepptu á Akureyri.

Keppnin fer fram í þremur deildum, eftir erfiðleikastigi: Delta deild, Beta deild og Alfa deild. Okkar fólki gekk prýðilega í keppninni og komst í verðlaunasæti.

Ernir Elí Ellertsson og Jóhann Gunnar Finnsson lentu í 3. sæti í Delta deild

Alans Treijs, Arnþór Atli Atlason og Dagur Smári Sigvaldason lentu í 3. sæti í Alfa deild

Birkir Snær Axelsson, Jón Haukur Skjóldal Þorsteinsson og Max Forster fengu viðurkenningu fyrir besta nafnið: MandelBros.

Forritun er kennd í MA hvort tveggja sem valgrein og skylduáfangi á raungreina- og tæknibraut. Hluti af áfanganum er að spreyta sig í forritunarkeppninni. Kennarar í forritun eru Ingvar Þór Jónsson og Jóhann Sigursteinn Björnsson. Þeir fylgdu nemendum sínum eftir á laugardaginn og Ingvar tók myndir.