Nemendum býðst að taka þátt í svefnrannsókn

 MA-ingum býðst nú að taka þátt í svefnrannsókn sem felst í að rannsaka svefnheilbrigði þar sem metin eru áhrif stuttrar fræðslu og núvitundaríhlutunar á svefnlengd, svefngæði, kvíða, þunglyndi og lífsgæði ungmenna.

• Annars vegar er óskað eftir 30 einstaklingum sem eru tilbúin að taka þátt í svefnrannsókninni ásamt íhlutun sem mun taka fjórar vikur. Íhlutunin felst í að mæta tvisvar sinnum í viku í 4 vikur kl. 16:10-16:50 á mánudögum og fimmtudögum í stutta fræðslu, taka þátt í öndunaræfingu og síðan jóga nidra sem er djúpslökun.
• Hins vegar er óskað eftir 25 einstaklingum sem taka eingöngu þátt í svefnrannsókninni án íhlutunar.

Svefnrannsóknin sjálf felur í sér að sofa með hring á fingri í 6 nætur fyrir íhlutun og svo aftur eftir íhlutun. Hringurinn safnar gögnum inn á app á vegum svefnrannsóknarfyrirtækisins SleepImage. Þar mun svefnlæknir fara yfir niðurstöður. Hvert og eitt mun fá upplýsingar um sínar svefnniðurstöður afhentar í lok rannsóknarinnar og ef niðurstöður leiða í ljós að þörf er á frekari aðstoð við að auka svefngæði þá mun hjúkrunarfræðingur skólans bjóða upp á frekari aðstoð eða leiða viðkomandi áfram í réttan farveg.

Til að rannsaka kvíða, þunglyndi og lífsgæði verða lagðir fram spurningalistar sem allir þátttakendur svara í upphafi og lok rannsóknarinnar.

Upplýsingarfundur verður haldinn mánudaginn 20. febrúar kl. 16:10 í stofu H9.  

Sólveig Magnúsdóttir, forstöðulæknir svefnrannsókna, MyCardio USA er ábyrgðarmaður rannsóknarinnar. Ingibjörg Magnúsdóttir, kennari í Menntaskólanum á Akureyri fer fyrir hópnum sem stendur að þessari rannsókn og sér um framkvæmd rannsóknarinnar.