Nemendur í leikhúsferð

Í Samkomuhúsinu

Nokkrir mentorar úr MA og VMA brugðu sér í leikhús í síðastliðinni viku ásamt góðvinum sínum úr grunnskólum Akureyrar.

Mentorverkefnið Vinátta er valgrein í báðum framhaldsskólunum á Akureyri og felst í því að nemendur hitta grunnskólabarn í hverri viku um veturinn og gera eitthvað skemmtilegt og uppbyggjandi saman eins og að fara í sund, gönguferðir, skauta, kaffihús, baka o.s.frv. Annað slagið hittist svo hópurinn allur saman um veturinn og brallar ýmislegt - þá er oft glatt á hjalla.

Í síðustu viku var sem sé á dagskrá að fara saman í leikhús og tækifærið notað að sjá lokaæfinguna á Lisu í Undralandi hjá Leikfélagi Akureyri, sem var frumsýnd um helgina og hefur fengið afar góða dóma.

Myndina tók Ásta Guðrún Eydal.