Nemendur kynna sér jarðhita, tómataræktun og Kröfluvirkjun

Nemendur í Kröfluvirkjun

Kennarar í jarðfræði, Einar Sigtryggsson og Þórhildur Björnsdóttir, fóru með 2.U, 2.V og 2.X í ferðalag á miðvikudag. Voru nemendur að kynna sér nýtingu á jarðhita á Íslandi og var förinni heitið austur á bóginn. Rútan brunaði með 51 nemanda alla leið á Hveravelli í Reykjahverfi, sem er skammt sunnan við Húsavík. Þar hefur jarðhitinn verið nýttur frá árinu 1906 og tómataræktun hófst þar árið 1930. Nú standa þar 11 gróðurhús, sem samtals eru 9.000 m² að flatarmáli. Tómatar, gúrkur og paprika eru helstu afurðirnar frá Hveravöllum en ýmislegt annað er þó ræktað þar. 

Haldið var suður á bóginn eftir Kísilveginum alla leið upp í Mývatnssveit og þaðan inn í Kröflueldstöðina. Í Kröfluvirkjun tók Helgi Arnar Alfreðsson, stúdent úr MA árið 2004, á móti hópnum og leiddi nemendur í allan sannleikann um töfra jarðhitans, Kröfluvirkjun og eftirlit með borholum og vöktun á eldstöðinni. 

Á heimleið þótti tilvalið að demba hópnum í sund á Laugum í Reykjadal. Ferðin heppnaðist afar vel og nemendur voru sjálfum sér og skólanum til sóma. 

Einar Sigtryggsson

Fleiri myndir eru á facebook síðu skólans.