Skólahald næsta vetur

Næsta vetur munu nýnemar stunda nám samkvæmt nýrri námskrá. Þeir sem verða í 2., 3. og 4. bekk halda áfram samkvæmt eldri námskránni. Breytingar verða á fjölda prófdaga og lengd kennslustunda, og þær munu eiga við um alla nemendur.

Nýja námskráin:

Helstu breytingar sem verða með nýrri námskrá frá og með komandi hausti verða þær að einingar í stúdentsprófinu verða 210 (eru 240 núna) og námið er skipulagt á þremur árum í stað fjögurra. Einnig er verið að skipuleggja ferla fyrir nemendur sem kjósa að taka námið á lengri tíma en þremur árum. Skólinn verður þó áfram með bekkjakerfi þannig að nemendur geta ekki ráðið alfarið á hvaða hraða þeir taka námið en sumum áföngum verður hægt að fresta ef þörf er á,

Brautir verða fjórar: Félagsgreinabraut, mála- og menningarbraut, náttúrufræðibraut og raungreinabraut. Nemendum er skipt á brautir strax á fyrsta ári og því líklegt að þeir nemendur sem kjósa að skipta um braut þurfi að bæta við sig einni önn. Líkt og áður hefur komið fram á ma.is er val nemenda mikið.

Samkvæmt tillögum að nýju skólaalmanaki fyrir næsta vetur fækkar prófdögum í lok annar um 2-3 en í þeirra stað koma námsmatsdagar sem dreifast yfir önnina og eru þá hvorttveggja hugsaðir til þess að nemendur hafi tíma til að vinna að verkefnum og kennarar að meta nemendur.

Breytingum á skólaárinu hefur verið frestað til 2017 eins og áður hefur verið greint frá og samkvæmt drögum að almanaki verður skóli settur 8. september 2016.

Skóladagurinn:

Kennslustundir munu lengjast um tíu mínútur, verða 50 mínútur í stað 40 mínútna. Verið er að skoða nokkrar útfærslur skóladagsins; hvort kennsla hefjist áfram 8:15 eða verði seinkað til 8:30, hvort matartíminn verði 45 mínútur eða 60 mínútur, hvort einar frímínútur eftir hádegi verði lengri eins og nú er eða þeim sleppt og nemendur því búnir fyrr í skólanum sem því nemur. Nemendur taka fleiri einingar á önn í nýju kerfi og því mun skóladagurinn lengjast eitthvað.

Breytingar á skipulagi kennsludags eiga við alla nemendur, hvort sem þeir eru í  nýrri námskrá eða gamalli.

Tillögur að námsferlum hafa verið sendir til menntamálastofnunar og bíða þar samþykktar.