Skólasetning 2017

Skólasetning 2017

Menntaskólinn á Akureyri var settur í morgun að viðstöddu miklu fjölmenni. Þarna voru nýnemar, foreldrar þeirra og forráðamenn aðrir nemendur, kennarar og starfsfólk. Tumi Hrannar-Pálmason fyrrverandi konsertmeistari og stúdent frá í vor lék í upphafi og söng nokkur Bítlalög. Jón Már Héðinsson setti svo skólann með ávarpi og liðkunaræfingum, hvatti nemendur til dáða og foreldra til að standa við bak barna sinna.

Í ávarpi skólameistara kom fram að nemendur skólans eru við upphaf haustannar 757. Á fyrsta ári eru 217 nemendur, á öðru ári eru þeir 208, á þriðja ári 165 og á fjórða ári eru alls 167 nemendur. Hann ítrekaði að MA væri landsmenntaskóli, margir nemendur eigi lögheimili utan Akureyrar og á Heimavistinni í vetur væru um 330 nemendur, þar af rúmlega helmingurinn úr MA.

Nýnemar fóru því næst í stofur með umsjónarkennurum en foreldrar og forráðamenn fengu kynningu á skólastarfinu hjá brautarstjórum og náms- og starfsráðgjöfum ásamt sálfræðingi. Að því loknui var haldinn aðalfundur ForMA, Foreldrafélags MA.

Nemendur 1. bekkjar mæta í skólann klukkan 8.15 á morgun, föstudag, og taka þátt í nýrri nýlnemagleði. Nemendur 2. og 3. bekkjar koma á sama tíma í reglulega kennslu samkvæmt stundaskrá. Nemendur 4. bekkjar koma í skólann 7. september að lokinni ferð til Króatíu, þar sem þeir eru ásamt fjórum kennurum.

Skólinn var nú settur í fyrsta sinn í ágústmánuði. Þannig týnist tíminn. Lengst af var hefð að skólasetning væri fyrsta sunnudag í október.

Myndir eru frá skólasetningu og fundi með foreldrum.