Skólaslit 2018

Stúdentar MA 2018

Menntaskólanum á Akureyri var slitið 17. júní í 138. sinn. Á meðan gestir flykktust í Íþróttahöllina lék Birna Eyfjörð Þorsteinsdóttir á píanó, en hún er nýr konsertmeistari MA. Við upphaf athafnarinnar léku þrjár stúlkur, Una Haraldsdóttir á píanó, Sólrún Svava Kjartansdóttir á fiðlu og Rún Árnadóttir á selló.

Úr ræðu skólameistara

Jón Már Héðinsson skólameistari hóf mál sitt á að benda á þá megináherslu skólans að hafa velferð nemandans í forgrunni og hún sameinaðist í einkunnarorðunum virðingu, víðsýni og árangri. Hann gat þess að nú væri næstsíðasti fjórði bekkur skólans að brautskrást og næsta vor yrði sá síðasti brautskráður ásamt fyrsta þriðja bekknum, samkvæmt nýrri skólaskipan, sem unnið hafi verið að hörðum höndum. Ráðuneyti menntamála hafi samþykkt nýja námskrá skólans á hefðbundnum sviðum, tungumálum, félagsgreinum, náttúruvísindum og raungreinum. Auk þess byði skólinn upp á tónlistarstúdentspróf í samvinnu við Tónlistarskólann á Akureyri og aðra tónlistarskóla á Norðurlandi. Þegar helmingur námsins væri byggður á vali nemendanna yrðu nemendur að nýta sköpunarkrafta sína og skólinn að vera skapandi lærdómsstofnun.

Skólameistari áréttaði að í þriggja ára námskrá yrði bekkjakerfinu haldið og kostir þess nýttir til jákvæðra samkipta, samvinnu og félagsfærni. Í kerfinu fælist jafnframt sveigjanleiki til að taka námið á hálfu til einu ári til viðbótar, ef nemendur kysu það. Lykilatriði væri að mennta nemendur sem sjálfstæða borgara með sterka siðferðisvitund. Og nemendur þyrfti að styðja á misbröttum vegi hvers og eins. Til þess hefði skólinn á að skipta öflugu forvarnateymi, tveimur náms- og starfsráðgjöfum og einum sálfræðingi. Tímarnir hefðu breyst og skólarnir með,„það þarf hugkvæmni til að koma til móts við þennan fjölbreytta nemendahóp. Það er ekki lengur hægt að ganga út frá því að í bóknámi sé hægt að bjóða bara upp á ódýrustu kennsluhættina sem eru fyrirlestrar yfir stórum hópum, nú þarf meiri leiðsagnarkennslu.“

Jón Már sagði frá samstarfi framhaldsskóla á Norðurlandi, meðal annars vel heppnaðri samvinnu MA og VMA á nýliðinni önn, sem framhald yrði á. Menntamálaráðherrar hafi sýnt samstarfi skólanna velvilja, en hins vegar hafi MA ekki fengið fjárveitingu til að færa skólaárið til fulls til samræmis við aðra skóla.

Í skólanum voru í vetur 742 nemendur en starfsmenn voru 80 og skólameistari þakkaði þeim vel unnin störf. Hann kvaddi svo þrjá kennara sem lengi hafa kennt við skólann, Sigurð Ólafsson fyrir 24 ára starf, Sigurð Bjarklind fyrir 40 ára starf og Sverri Pál Erlendsson fyrir að hafa starfað í 44 ár.

Skólameistari fjallaði um mikilvægi félagslífs í skóla og þess að nemendur stýrðu því og skipulegðu sjálfir, þetta væri í raun verkleg æfing í grunnþáttum menntunar. Mjög margir byðu sig fram til embætta í félagsstarfinu og kosningaþátttaka hefði nú verið um 90%. Hann sagði að öflugur skóli þrifist ekki nema með blómlegu félagslífi og að því þyrfti að hlú í styttum skóla. Skólafélagið Huginn hefði sem fyrr stýrt glæsilegri vímulausri árshátíð, Leikfélag MA sýnt LoveStar af metnaði svo eftir hefði verið tekið, sigurvegarinn í söngkeppni MA hefði líka unnið söngkeppni framhaldsskólanna, Gettu betur liðið hefði farið í undanúrslit og Morfís staðið sig með prýði, skólablaðið Muninn hefði komið út vor og haust og jafnréttisráð starfað ötullega, haldnar fjölmargar kvöldvökur og peningum safnað fyrir Aflið í góðgerðaviku. Þá hefðu nemendur staðið sig afar vel í námstengdri keppni, meðal annars í stærðfræði, eðlisfræði, þýsku og ensku og auk þess unnið til verðlauna í ljóða- og sagnagerð. Þá mætti nefna þátttöku í samfélagsverkefnum, afburðanemendur í listgreinum og afreks- og landsliðsfólk í íþróttum. Þannig mætti lengi telja þá góðu nemendur sem bæru hróður skólans víða, heima og erlendis.

Fulltrúar afmælisárganga tóku til máls og færðu skólanum kveðjur og gjafir. Fulltrúi 70 ára stúdenta var Sváfnir Sveinbjarnarson, 60 ára stúdenta Lovísa Sigurðardóttir, 50 ára stúdenta Kristín Indriðadóttir, 40 ára stúdenta Helga Ragnheiður Gunnlaugsdóttir, 25 ára stúdenta Laufey Árnadóttir og fulltrúi 10 ára stúdenta var Konráð S. Guðjónsson. Fulltrúi 25 ára stúdenta greindi frá úthlutun úr Uglusjóði, hollvinasjóði MA.

Skólameistari brautskráði þessu næst 164 nýstúdenta og hlutu margir verðlaun og viðurkenningar fyrir árangur sinn í námi og áhrif á skólalífið. Alls hlutu átta nemendur ágætiseinkunn 9 eða hærra og margir fleiri fengu verðlaun og viðurkenningar fyrir árangur sinn:

• Hæsta einkunn á stúdentsprófi, sem er meðaltal einkunna öll fjögur skólaárin, hlaut Erna Sól Sigmarsdóttir, 9,56. Hún var dux og hlaut fyrir það gulluglu frá skólanum. Hún fékk verðlaun fyrir framúrskarandi árangur í efnafræði, framúrskarandi árangur í eðlisfræði frá Norðurorku, í líffræði frá Sjúkrahúsinu á Akureyri og fyrir framúrskarandi árangur í raungreinum frá Gámaþjónustunni.
• Næsthæstu einkunn hlaut Ragnheiður Pétursdóttir, 9,52,  en hún hlaut fyrir árangur sinn Raungreinaverðlaun Háskólans í Reykjavík, verðlaun frá danska sendiráðinu fyrir framúrskarandi árangur í dönsku og frá þýska sendiráðinu fyrir framúrskarandi árangur í þýsku
• Eva María Aradóttir hlaut 9,35, en hún hlaut verðlaun fyrir framúrskarandi árangur í spænsku.
• Urður Andradóttir hlaut einkunnina 9,33, verðlaun frá Norðurorku fyrir framúrskarandi árangur í eðlisfræði, frá Þórarinssjóði fyrir framúrskarandi árangur í frönsku, frá Íslenska stærðfræðafélaginu fyrir framúrskarandi árangur í stærðfræði og úr Hjaltalínssjóði fyrir framúrskarandi árangur í íslensku og ensku.
• Hrafnhildur Gunnarsdóttir var með einkunnina 9,26, en hún hlaut verðlaun fyrir framúrskarandi árangur í raungreinum.
• Iðunn Andradóttir var með lokaeinkunnina 9,22, og hlaut verðlaun fyrir framúrskarandi árangur í raungreinum.
• Ragnar Sigurður Kristjánsson var með 9,14 á stúdentsprófinu og hlaut verðlaun fyrir framúrskarandi árangur í hagfræði og verðlaun úr Brynleifssjóði fyrir afar góðan árangur í sögu.
• Oddur Pálsson var með einkunnina 9,06, en hann hlaut Íslenskuverðlaun MA, bók frá Pennanum Eymundssyni, og verðlaun úr Brynleifssjóði fyrir framúrskarandi árangur í sögu.
• Agnes Ögmundsdóttir fékk  verðlaun frá SBA fyrir afar góðan árangur í ferðamálafræði.
• Harpa Jóhannsdóttir fékk verðlaun fyrir framúrskarandi árangur í félagsfræði.
• Ingvar Þóroddsson fékk Menntaverðlaun Háskóla Islands fyrir framúrskarandi árangur á stúdentsprófi og verðlaun fyrir eftirtektarverðan árangur í listum og félagsstarfi. Einnig fékk hann gjöf frá skólanum fyrir forystu og stjórn í félagsstarfi nemenda.
• Katla Dögg Traustadóttir fékk verðlaun fyrir framúrskarandi árangur í ensku.
• Katla Þórarinsdóttir hlaut viðurkenningu fyrir framúrskarandi skólasókn og ástundun.
• Sindri Unnsteinsson hlaut verðlaun frá Íslenska stærðfræðafélaginu fyrir framúrskarandi árangur í stærðfræði.
• Sólrún Fríða Friðriksdóttir hlaut verðlaun úr Þórarinssjóði fyrir framúrskarandi árangur í frönsku.
• Sunna Birgisdóttir hlaut verðlaun fyrir framúrskarandi árangur í sálfræði.
• Tinna Björg Gunnarsdóttir hlaut verðlaun fyrir framúrskarandi árangur í sálfræði.
• Þóra Kristín Karlsdóttir hlaut Stjörnu-Odda verðlaunin frá Vísindafélagi Norðlendinga fyrir árangur sinn í störnu- og stjarneðlisfræði.

Að brautskráningu lokinni flutti Ingvar Þóroddsson fráfarandi formaður skólafélagsins Hugins ávarp nýstúdenta.

Að lokum flutti skólameistari nýstúdentum kveðjuorð, þakkaði þeim ánægjulegt samstarf og þátttöku í breytingaferli skólans. Hann ítrekaði mikilvægi kveðjustunda og rækt vinabanda og hvatti þá til að trúa á drauma sína, seiglu og hæfileika.

Athöfninni lauk á því að allir sungu skólasöng MA, Undir skólans menntamerki.