Velgengnisdagar vor 2013

Frá kynningu tungumálakjörsviðs

Núna standa yfir svokallaðir velgengnisdagar í 1. og 2. bekk en þar er í raun um að ræða samþjappaða lífsleikni af ýmsu tagi. Þá er markvisst unnið með grunnþætti menntastefnunnar þrjá daga í röð og önnur kennsla lögð niður á meðan.

Í fyrsta bekk fara bekkir í gegnum 4 smiðjur sem hver um sig snýst um ákveðin markmið og leiðir að góðu og heilbrigðu lífi.

Smiðjurnar eru:

• Hvar liggja mörkin? Í þeirri smiðju beina kennarar og nemendur sjónum sínum að hvar mörkin á milli hins siðlega og ósiðlega liggja og skoða í því skyni dægurmenningu okkar s.s. eins og auglýsingar, tónlistarmyndbönd og orðræðuna í samfélaginu.
• Geðrækt. Í þeirri smiðju eru rædd ýmis atriði sem snerta á einn eða annan hátt líðan okkar og hvað það er sem byggir upp og hlúir að geðheilsu. Einn liður í geðræktarsmiðjunni hefur t.d. verið að skrifa þakkarbréf til einhvers sem skipt hefur nemendur máli og margir hafa því fengið slík bréf á undanförnum árum, fjölskylda, vinir, kennarar o.fl.
• Áhættuhegðun. Sú smiðja er hugsuð til að vekja nemendur til vitundar um ýmsar tegundar áhættuhegðunar og persónulegrar ábyrgðar hvers og eins til að draga úr tíðni hennar og neikvæðum afleiðingum.
• Heilsueflandi framhaldsskóli. Þar fara nemendur í hópeflisleik sem m.a. felst í að nemendur fara út um allan bæ, leysa þrautir og láta gott af sér leiða. Liðin safna stigum og veitt eru verðlaun fyrir stigahæsta liðið. Íslenskir rófubændur styrkja þessu smiðju með því að gefa rófur þannig að nemendur fá rófur að loknum leik til að auka orkuna aftur.

Tvær smiðjanna, Hvar liggja mörkin og Geðræktin eru meira eða minna kynjaskiptar. Fjórir kennarar sjá um hverja smiðju.

Í 2. bekk eru tvö meginþemu:

• Annars vegar náms- og starfsval. Þá eru kjörsvið og kjörsviðslínur kynntar, eldri nemendur segja frá námsleiðum og einnig komu nemendur úr HR og HÍ og kynntu raungreina- og tækninám fyrir nemendum á raungreinasviði. Háskólinn á Akureyri býður einnig öllum nemendum í heimsókn og kynnir námið.
• Hins vegar er svokölluð borgaravitund í brennidepli, þ.e. að skoða hvernig borgararnir (við öll!) geta haft áhrif á samfélagið og þær ákvarðanir sem þar eru teknar. Sjónunum er einna helst beint að starfsemi frjálsra félagasamtaka og í kjölfarið halda nemendur svokallaðan góðgerðardag  þar sem bekkir ákveða að styrkja einhver góð málefni með ýmsum uppákomum. Sem dæmi um verkefni á góðgerðardeginum núna er áheitahlaup milli Dalvíkur og Akureyrar og vinabönd seld til styrktar Hetjunum, bókasöfnun fyrir geðdeild FSA, fatamarkað í Rauða krossinum, athygli vakin á Fair trade, bingó til styrktar Eik, heimsóknir á leikskóla og á Hlíð.
• Einnig er farið í mannréttindaleikinn "Sköpum tengsl" undir leiðsögn Péturs Björgvins Þorsteinssonar og í tengslum við hann koma fulltrúar bæjaryfirvalda, fjölmiðla, fyrirtækja og almennra borgara í heimsókn og segja frá hlutverki þeirra í samfélaginu